هن بمباريءَ جي نتيجي ۾ رهائشي علائقن ۾ وڏي پيماني تي تباهي ٿي آهي. لبناني صحت واري وزارت جي انگن اکرن موجب، شهيدن جو انگ 50 تائين پهچي ويو آهي ۽ 350 ماڻهو زخمي ٿي چڪا آهن.
غنا حالڪ
بيروت: لبنان گذريل سومر جي پرهه ڦٽيءَ مهل امن امان جي بدترين صورتحال کي منهن ڏنو، جڏهن اسرائيلي جهازن بيروت جي ڏاکڻين مضافات، ڏکڻ لبنان ۽ بقاع جي علائقن تي اوچتو ۽ پرتشدد حملن جو سلسلو شروع ڪري ڏنو.
هيءَ شدت پسندي جنگبنديءَ جي معاهدي کان لڳ ڀڳ ڏيڍ سال پوءِ سامهون آئي آهي، جنهن دوران اسرائيل ”دهشتگردي خلاف جنگ“ جي بهاني ڪيترائي ڀيرا ڳوٺن تي گولا باري ڪري ۽ عام شهرين کي نشانو بڻائي معاهدي جي ڀڃڪڙي ڪئي. مارجي ويلن ۾ اڪثريت عورتن ۽ ٻارن جي هئي.
هن بمباريءَ جي نتيجي ۾ رهائشي علائقن ۾ وڏي پيماني تي تباهي ٿي آهي. لبناني صحت واري وزارت جي انگن اکرن موجب، شهيدن جو انگ 50 تائين پهچي ويو آهي ۽ 350 ماڻهو زخمي ٿي چڪا آهن.
هن اوچتي حملي سبب لڏپلاڻ جو هڪ وڏو بحران پيدا ٿي پيو آهي؛ هزارين خاندان باهه جي برسات ۾ پنهنجا گهر ڇڏي گاديءَ واري شهر (بيروت) ۽ جبلن وارن علائقن ڏانهن لڏي ويا آهن. هينئر تائين لڏپلاڻ ڪندڙ ماڻهن جو انگ 3 لک 50 هزار تائين پهچي چڪو آهي.
جڏهن پناهه گاهون ۽ اسڪول پنهنجي گنجائش کان وڌي ويا، ته ڪيترائي ماڻهو سخت موسم ۽ بدترين معاشي بحران جي وچ ۾ رستن تي يا پنهنجي گاڏين ۾ سمهڻ تي مجبور ٿي ويا آهن.
مان هي مضمون گاديءَ واري شهر جي آسمان تي ڊرون جهازن جي مسلسل گونج ۽ گولا باري جي ان گجگوڙ ۾ لکي رهي آهيان، جيڪا خوف وچان انتظار جي خاموشيءَ کي چيري رهي آهي ۽ وقفي وقفي سان منهنجي گهر جي ديوارن کي لوڏي رهي آهي. اهڙي صورتحال ۾ عالمي سطح تي اهو خوف پيدا ٿي ويو آهي ته متان هي خطو هڪ مڪمل جنگ جي گهيري ۾ نه اچي وڃي.
____________
غنا حالڪ صحافي ۽ ايشيا جرنلسٽس ائسوسيئيشن جي ميمبر آھي. خبر جو ذريعو The AsiaN
