سماجي توازن ۽ ڪاميابيءَ جو گُر: اختلاف، اَنا ۽ ضد ۾ فرق کي سمجھو

ها ۾ ها ملائڻ جو مقصد هرگز اهو ناهي ته توهان پنهنجي شخصيت وڃائي ويھو يا غلط ڳالھ جي تائيد ڪريو، پر ان جو اصل مقصد پاڻ ۾ ٿوري لچڪ آڻي سماجي هم آهنگي پيدا ڪرڻ آهي.

اڄڪلھ جي دؤر ۾ هر ماڻھو نفسياتي مونجھارن جو شڪار آهي، جنھن جو وڏو سبب اهو ضد آهي ته مان جيڪو چوان، سو ئي صحيح آهي. جتي “مان” اچي وڃي، اتي ماکي کٽي ويندي آهي ۽ تلخي وڌي ويندي آهي

حڪيم پريم چاندواڻي

انساني سماج ۾ رهندي اسان کي روزانو سوين اهڙن موڙن تان گذرڻو پوي ٿو، جتي اسان جي زبان مان نڪتل هڪ لفظ اسان جي مستقبل جو فيصلو ڪندو آهي. ڪڏهن ڪڏهن اسان جي انا اسان کي روڪيندي آهي، پر حقيقت ۾ زندگيءَ جي تلخين کي مٺاڻ ۾ بدلائڻ لاءِ جنهن سياڻپ جي ضرورت آهي، سا رڳو لچڪ ۾ ئي موجود آهي. سياڻن جو قول آهي ته جيڪو لڙڪي ٿو، سو ئي بچي ٿو.

هن فلسفي کي سمجهڻ لاءِ هڪ نهايت ئي گهري ڳالهه ذهن ۾ رکڻ گهرجي:

 ها  ۾  ها، جو ملائيندو،

 مکڻ ماکي، سو کائيندو۔

لچڪ ۽ مصلحت: ڪاميابيءَ جا بنياد

جديد دؤر جي نفسيات اسان کي ٻڌائي ٿي ته دنيا ۾ اهي ماڻهو ڪڏهن به ناڪام ناهن ٿيندا، جيڪي حالتن جي وهڪري سان گڏ هلڻ ڄاڻن ٿا. “ها ۾ ها” ملائڻ جو مقصد هرگز اهو ناهي ته توهان پنهنجي شخصيت وڃائي ويهو يا غلط ڳالهه جي تائيد ڪريو، پر ان جو اصل مقصد پاڻ ۾ ٿوري لچڪ آڻي سماجي هم آهنگي پيدا ڪرڻ آهي. جڏهن اسان ٻين جي راءِ کي عزت ڏيون ٿا ۽ بحث جي باهه کي وڌائڻ بدران اتفاق جي راهه چونڊيون ٿا، ته سماج ۾ اسان لاءِ قبوليت جا دروازا کلي وڃن ٿا.

مکڻ ۽ ماکي: نتيجي جو مٺاڻ

زندگيءَ ۾ مکڻ ۽ ماکي اهي انعام آهن جيڪي رڳو کٽيندڙن کي ملندا آهن. پر اهي کٽيندڙ اهي ناهن جيڪي تلوارن سان ميدان مارين ٿا، بلڪہ اهي آهن جيڪي پنهنجي نرمي، مٺڙي زبان ۽ معاملي فهميءَ سان ماڻهن جون دليون کٽين ٿا.

 * نرمي (مکڻ): توهان جي ڪردار جي نرمي مشڪل کان مشڪل معاملن کي به آسان بڻائي ڇڏي ٿي.

 * مٺاڻ (ماکي): جڏهن توهان مخالفت بدران موافقت جو رستو اختيار ڪريو ٿا، ته ان جو نتيجو هميشه مٺو نڪري ٿو.

سماجي تعلقات ۽ “ها” جي طاقت

اڄڪلهه جي دؤر ۾ هر ماڻهو نفسياتي مونجهارن جو شڪار آهي، جنهن جو وڏو سبب اهو ضد آهي ته مان جيڪو چوان، سو ئي صحيح آهي. جتي “مان” اچي وڃي، اتي ماکي کٽي ويندي آهي ۽ تلخي وڌي ويندي آهي. ان جي برعڪس، لچڪ رکندڙ شخص پنهنجي چوڌاري هڪ اهڙو حصار قائم ڪري ٿو، جتي هرڪو کيس مانُ ڏئي ٿو.

اسان کي گهرجي ته پنهنجي گفتگو ۾ لچڪ پيدا ڪريون. زندگي هڪ اهڙو دسترخوان آهي جتي مٺاڻ کائڻ جو حقدار صرف اهو آهي جيڪو ڪڙاڻ ۽ تلخيءَ کان پاسو ڪري ٿو. ياد رکو، ضدي ماڻهو اڪيلو رهجي ويندو آهي، پر موافقت رکندڙ شخص هميشه نعمتن سان مالا مال رهي ٿو.

تنهنڪري، جيڪڏهن توهان چاهيو ٿا ته زندگي پنهنجي تمام تر مٺاڻ سان توهان جي آجيان ڪري، ته پوءِ پنهنجي اندر مان “نه” جو انڪار ڪڍي، لچڪ واري “ها” کي جاءِ ڏيو.

با ادب، رهي با اختيار،

بي ادب،  صفا  بيڪار

_____________

حڪيم پريم چاندواڻي شاعر ۽ ڪالم نگار آھي. ھُو لاڙڪاڻي ضلعي جي شھر ڏوڪريءَ ۾ رھي ٿو