40 ڊگري گرميءَ جي باوجود مالي بچت لاءِ ڪوريائي جوڙن جو آگسٽ ۾ شادين تي زور

ڏکڻ ڪوريا جي راڄڌاني سيئول ۾ گرمي پد 2018ع کانپوءِ پهريون ڀيرو 40 ڊگري سينٽي گريڊ تائين پهچي ويو آهي ۽ سخت گرميءَ سبب ڪيترائي جاني نقصان به ٿيا آهن. ان جي باوجود، نوجوان ڪوريائي جوڙا معاشي دٻاءَ ۽ گهر خريد ڪرڻ جي گڏيل خواهش سبب سخت گرم مهيني آگسٽ ۾ شاديون ڪرڻ کي ترجيح ڏئي رهيا آهن، ته جيئن شاديءَ جي خرچن ۾ لکين وان جي بچت ٿي سگهي.

 لِي سانگ ڪِي وٽان

رڪارڊ ٽوڙ گرميءَ جي باوجود، وڌيڪ نوجوان ڪوريائي جوڙا آگسٽ ۾ شادي ڪرڻ کي ترجيح ڏئي رهيا آهن، جنهن جو وڏو سبب مالي مجبوريون آهن. ڪوريا ڪنزيومر ايجنسي موجب، جنوري، فيبروري، جولاءِ ۽ آگسٽ جي “آف سيزن” (جڏهن شاديون گهٽ ٿينديون آهن) مهينن دوران شاديءَ جو سراسري خرچ لڳ ڀڳ 19.54 ملين وان هوندو آهي، جيڪو رش وارن مهينن جي ڀيٽ ۾ لڳ ڀڳ 2 ملين وان گهٽ آهي. ڪووڊ-19 جي وبا دوران ڪيترائي شادي هال بند ٿيڻ سبب، هاڻي شادي هالن جي بڪنگ پڻ مشڪل ٿي وئي آهي، جڏهن ته شادين جي شرح ۾ ٻيهر واڌ اچي رهي آهي.

ان کانسواءِ رهائش جا مسئلا پڻ هڪ ٻيو اهم سبب آهن. گهرن جي وڌندڙ قيمتن ۽ قرض توڙي هائوسنگ سبسڪرپشنز تي سخت پابندين سبب، 30 سالن جي ڄمار وارا ڪيترائي جوڙا شاديءَ کي گهر خريد ڪرڻ لاءِ پنهنجي آمدني ۽ اثاثن کي گڏ ڪرڻ جو هڪ ذريعو سمجهن ٿا. تنهنڪري، آگسٽ ۾ ٿيندڙ شاديون صرف موسمي ترجيح نه آهن، پر اهي انهن معاشي دٻائن کي ظاهر ڪن ٿيون جن کي منهن ڏيندي نوجوان ڪوريائي، شادي جي خرچن کي گهٽائڻ سان گڏ رهائش ۽ اثاثا ٺاهڻ جي ڪوشش ڪري رهيا آهن.

ٻئي طرف، سرءُ جي روايتي شروعات ايپچو (Ipchu) کان هڪ ڏينهن اڳ، 6 آگسٽ تي سيئول ۾ گرمي پد 40.0°C تائين پهچي ويو. يونگديونگپو (Yeongdeungpo) ضلعي جي دانگسان-دونگ علائقي ۾ هڪ آٽوميٽڪ موسمياتي اسٽيشن پاران رڪارڊ ڪيل هي گرمي پد 2018ع کان پوءِ پهريون ڀيرو هو جڏهن سيئول ۾ گرمي 40 ڊگري سينٽي گريڊ کان مٿي ويو ھو. يونگسان ۾ هڪ سرڪاري اسٽيشن پڻ 39.9°C گرمي پد رڪارڊ ڪيو. 7 آگسٽ تي سيئول ۾ گرمي پد 39 ڊگري تائين پهچڻ سان شهر 1996ع ۾ موسمي رڪارڊ شروع ٿيڻ کان پوءِ پنهنجي سڀ کان گرم ‘ايپچو’ جو تجربو ڪيو.

موسمياتي ماهرن هن مسلسل گرميءَ جو ڪارڻ تبتي ۽ نارٿ پيسيفڪ هاءِ جي ٺهيل ڊبل هاءِ پريشر سسٽم کي قرار ڏنو آهي، جنهن ڪوريائي جزيري نما تي هڪ شديد ‘هيٽ-ڊوم’ (گرمي جو گنبذ) جو اثر پيدا ڪيو آهي. هن سال گرميءَ سبب ٿيندڙ بيمارين جا 2,665 ڪيس ظاھر ٿيا آهن، جن ۾ 23 فوتگيون به شامل آهن. فوت ٿيڻ وارن مان اڌ کان وڌيڪ ماڻهو 80 سال يا ان کان وڌيڪ ڄمار جا هئا. اختيارين ماڻهن تي زور ڀريو آهي ته هو ٻاهرين سرگرمين کان پاسو ڪن ۽ پاڻي جو گهڻو استعمال ڪن.

___________

لي سانگ-ڪي  ايشيا جرنلسٽ ايسوسيئيشن (AJA) جو باني ۽ دي ايشين (THE AsiaN) جو پبلشر آھي

ڏکڻ ڪوريا جي خابرو اداري The AsiaN ھي انگريزي سروس جي ٿورن سان