انڊيا جي ساھتيه اڪيڊميءَ پاران نامياري سنڌي اديب لکمي کلاڻيءَ لاءِ ‘فيلوشپ’ جو اعلان

ساھتيه اڪيڊميءَ جي جنرل ڪائونسل ھڪ تازي اجلاس ۾ ڊاڪٽر پرتيڀا راءِ (اوڊيا)، شري لکمي کلاڻي (سنڌي) ۽ شري عبد الصمد (اردو) کي ‘ساھتيه اڪيڊمي فيلوشپ’ ڏيڻ جي سفارش ڪئي.

نئين دهلي: ساھتيه اڪيڊمي جي جنرل ڪائونسل، 30 مارچ 2026 تي ٿيل اجلاس ۾، ٽن نامور اديبن ڊاڪٽر پرتيڀا راءِ (اوڊيا)، شري لکمي کلاڻي (سنڌي) ۽ شري عبد الصمد (اردو) کي ‘ساھتيه اڪيڊمي فيلوشپ’ ڏيڻ جي سفارش ڪئي آهي، ڀارت سرڪار جي ثقافت واري وزارت جي ھڪ پڌرائيءَ ۾ وزارت جي سيڪريٽري پَلوي پرشانت هولڪر اھڙي ڳالھ ڪئي.  

ساھتيه اڪيڊمي فيلوشپ اعليٰ ترين ادبي اعزاز آهي جيڪو ساھتيه اڪيڊمي پاران ڏنو ويندو آهي. هي ڀارت جو هڪ اهم ادبي ادارو آهي، جيڪو ڀارت جي ثقافت واري وزارت جي نگراني ۾ ڪم ڪري ٿو. هي هڪ اھڙو اعزاز آهي، جيڪو عام طور تي هندوستاني ادب جي “امر شخصيتن” لاءِ مخصوص هوندو آهي.

پرتيڀا راءِ: پدما ڀوشن ڊاڪٽر پرتيڀا راءِ اوڊيا ٻوليءَ جي هڪ مشهور ليکڪا، اسڪالر ۽ تعليمي ماهر آهي. سندس 50 کان وڌيڪ ڪتاب شائع ٿيل آهن. پنهنجي ڊگھي ۽ شاندار ڪيريئر دوران، ڊاڪٽر پرتيڀا راءِ کي ڪيترن ئي اعزازن ۽ انعامن سان نوازيو ويو آهي، جن ۾ پدما ڀوشن، گيان پيٺ، ساھتيه اڪيڊمي ايوارڊ ۽ سرلا ايوارڊ شامل آهن.

لکمي کلاڻي: شري لکمي کلاڻي (لڇمي چند ڀيريومل کلاڻي) سنڌي ٻوليءَ جو هڪ نامور افسانه نگار، ڊرامه نگار، مترجم، ايڊيٽر ۽ عالم آهي. سندس ٻن ڊزن کان وڌيڪ ڪتاب شايع ٿيل آهن ۽ وڏي انگ ۾ مقالا پڻ لکيل اٿس. کيس ساھتيه اڪيڊمي ايوارڊ ۽ ترجمي لاءِ ساھتيه اڪيڊمي پرائيز سميت ٻيا ڪيترائي اعزاز ملي چڪا آهن.

عبد الصمد: شري عبد الصمد اردوءَ جو هڪ مشهور اديب ۽ شاعر آهي. سندس ٻن ڊزن کان وڌيڪ ڪتاب شايع ٿيل آهن. کيس ساھتيه اڪيڊمي ايوارڊ، غالب ايوارڊ، ڀارتيه ڀاشا پريشد ايوارڊ ۽ اردو اڪيڊمي پاران ‘لائف ٽائيم اچيومينٽ ايوارڊ’ ملي چڪا آهن.

هي اعزاز ڀارتي ادب ۾ تمام گهڻي اهميت رکي ٿو، ڇاڪاڻ ته هي رڳو انهن اديبن کي ڏنو ويندو آهي جن جون خدمتون ناقابلِ فراموش هونديون آهن. هي فيلوشپ هڪ خاص تقريب ۾ پيش ڪئي ويندي، جنهن جي تاريخ جو اعلان بعد ۾ ڪيو ويندو.

_______________