ھوليءَ جي ڏڻ تي هندو برادريءَ ۾ جوش جذبو، ڍاڪا شھر ۾ رنگ پکڙجي ويا
راڌا ۽ ڪرشن جي لافاني محبت جي رنگن ۾ رڱيل بهار جي هن ميلي هڪ ڀيرو ٻيهر امن ۽ هڪجهڙائي جو پيغام ڏنو—ماڻهن کي ترغيب ڏني ته هو فرقن کي وساري، هڪ ٻئي کي ڳلي لڳائين ۽ زندگي کي خوشي ۽ سڪون جي رنگن سان ڀري ڇڏين.
ڀانو رنجن چڪرورتي
ڍاڪا: جيئن ئي مُندن جو بادشاهه بهار پهتو، ته بهار جي روح شهر کي رنگن ۾ رنگي ڇڏيو. گيتن، ٽهڪن ۽ رنگين پاؤڊر جي بادلن فضا کي ڀري ڇڏيو، ۽ ماڻهن بسنت، يعني تجديد ۽ خوشيءَ جي موسم کي خوش آمديد چيو.
ٽين مارچ تي بسنت اتسو (بهار جو ميلو) ۽ ڊول جاترا ملهايو ويو، جيڪو بنگالي مهيني ڦڳڻ جي پهرين چنڊ جي تاريخ تي ملهايو ويندو آهي، جنهن کي ”ڦڳڻي پورنيما“ چيو ويندو آهي. هن ڏينهن تي هندو برادريءَ جا ماڻهو مندرن ۾ گڏ ٿيندا آهن ته جيئن مذهبي عقيدت سان ڀڳوان ڪرشن ۽ رادھا جي پوڄا ڪن.
هي تهوار هوليءَ سان ويجھو تعلق رکي ٿو، جنهن کي عام طور تي رنگن جو تهوار چيو ويندو آهي. هي بهار جي آمد جي خوشي ملهائڻ ۽ ختم ٿيندڙ سياري تي خوشي ۽ تازگي، ۽ سوڀ جي علامت آهي. هولي جي دوران، ماڻهو روايتي طور تي هڪ ٻئي کي رنگين پاؤڊر لڳائيندا آهن جيڪو دوستي ۽ خيرسگالي جي نشاني آهي.
بنگال ۾، اها تقريب ”ڊول جاترا“ جي صورت ۾ ملهائي ويندي آهي، جيڪا هڪ مذهبي جلوس هوندو آهي. هي جلوس راڌا ۽ ڪرشن جي محبت جي ياد ۾ ڪڍيو ويندو آهي، اها ڪهاڻي جنهن صدين کان عقيدت ۽ ثقافتي روايتن کي اتساهه ڏنو آهي.
ڏينهن کي وڌيڪ يادگار بنائڻ لاءِ بنگلاديش ۽ هندستاني رياست اولهه بنگال جي هندو برادري پاڻ کي بهار جي رنگن ۾ رڱي ڇڏيو. ڍاڪا ۽ ٻين شهرن ۾، هندو رهواسي رنگين تهوار ملهائڻ لاءِ مندرن ۾ گڏ ٿيا.
صبح جو جلوس مندرن تان شروع ٿيا، جن ۾ بهار جا مٺڙا گيت، روايتي ناچ ۽ ’ڍاڪ‘ (روايتي دهل) جا آواز شامل هئا. ’ابير‘ (چمڪندڙ رنگين پاؤڊر) جي بادلن فضا کي ڀري ڇڏيو، جنهن هڪ اهڙو شاندار منظر پيدا ڪيو جو مقامي رهواسي حيران رهجي ويا.
هن تقريب ۾ ڪنوارين، جوان ڇوڪرين ۽ هر عمر جي ماڻهن جوش خروش سان حصو ورتو. ڪيترين ئي عورتن پيلي ۽ بهار جي ٻين رنگن جون ساڙهيون پاتيون هيون ۽ گلن سان سينگار ڪيل هو، جنهن جشن جي ماحول ۾ وڌيڪ خوبصورتي ۽ گرمجوشي پيدا ڪئي. سندن موجودگي تقريب کي هڪ خاص رونق بخشي ۽ ان سان لاڳاپيل گهري ثقافتي فخر جي عڪاسي ڪئي.
سڄو ڏينهن اهو علائقو موسيقي، رنگن ۽ ٽهڪن سان گونجندو رهيو، جنهن شرڪت ڪندڙن کي ياد ڏياريو ته بسنت اتسو صرف هڪ موسمي ميلو ناهي، پر هي زندگي، محبت ۽ ڀائيچاري جو جشن آهي.
راڌا ۽ ڪرشن جي لافاني محبت جي رنگن ۾ رڱيل بهار جي هن ميلي هڪ ڀيرو ٻيهر امن ۽ هڪجهڙائي جو پيغام ڏنو—ماڻهن کي ترغيب ڏني ته هو فرقن کي وساري، هڪ ٻئي کي ڳلي لڳائين ۽ زندگي کي خوشي ۽ سڪون جي رنگن سان ڀري ڇڏين.
_____________
ڀانو رنجن چڪرورتي بنگلاديش جو سينئر صحافي آھي. ھيءَ خبر ڪوريا جي خبر ايجنسي The AsiaN جي انگريزي سروس تان ورتي وئي
