اسڪولي درسي ڪتابن ۾ آفتن کان بچاءَ ۽ ثقافتي ورثي بابت سبق شامل ھوندا   

درسي تبديلين لاءِ سنڌ ٽيڪسٽ بُڪ بورڊ جي ورڪشاپ ۾ جديد تعليمي طريقن ۽ نصاب سان هم آهنگ مواد جي تياريءَ جي حڪمت عملين تي ويچار ڪيو ويو

ڄامشورو

سنڌ ٽيڪسٽ بڪ بورڊ پاران 27 آگسٽ 2025 تي ٻن ڏينهن جو هڪ  ورڪشاپ شروع ٿيو، جنهن ۾ 22 ليکڪ، تجربيڪار استاد ۽ درسي ڪتابن جا ماهر شريڪ ٿيا ته جيئن ٽئين کان اٺين درجي تائين جي آسان سنڌي ۽ لازمي سنڌيءَ جي درسي ڪتابن جي معياري تياري کي ممڪن بڻائي سگهجي. 

هن ورڪشاپ ۾ شرڪت ڪندڙن کي جديد تعليمي طريقن، نصاب سان هم آهنگ مواد جي تياريءَ جي حڪمت عملين ۽ جديد فريم ورڪن سان ليس ڪرڻ جي سلسلي ۾ شريڪ ٿيندڙن کي تربيت ڏني وئي ته جيئن سنڌ جي ٻارن لاءِ دلچسپ، ثقافتي طور تي لاڳاپيل ۽ تعليمي طور مضبوط درسي ڪتاب تيار ڪيا وڃن.

پهرئين ڏينهن معروف نصابي ماهر، ادريس جتوئيءَ  نصاب جي سمجھ ۽ ان کي درسي ڪتابن سان هم آهنگ ڪرڻ تي سيشن ورتو، جنهن ۾ درسي ڪتابن جي مواد کي مختلف نصابي فريم ورڪن سان هم آهنگ ڪرڻ لاءِ رهنمائي فراهم ڪئي وئي؛ غلام مصطفى ناگراج، “فوڊ ۽ نيوٽريشن جي فريم ورڪ جو انضمام” تي سيشن منعقد ڪيو، جنهن ۾ سنڌي زبان جي سبقن ۾ صحت، غذائيت ۽ پائيدار زندگيءَ جا موضوع شامل ڪرڻ جا عملي طريقا پيش ڪيا ويا؛ ڊاڪٽر محمد طفيل “بلومز ٽيڪسانومي جو SLOs ۽ تشخيص ذريعي انضمام” تي جامع سيشن پيش ڪيو، جنهن ۾ شرڪت ڪندڙن کي شاگردن جي سکيا جي نتيجن (SLOs) کي بهتر بڻائڻ ۽ سنجيدگيءَ سان سوچڻ جي صلاحيتن کي فروغ ڏيڻ لاءِ طريقا سمجھايا ويا؛ ناظم علي خان ماتلويءَ “آسان سنڌي درسي ڪتابن جي تياري (گريڊ III–VIII)” تي سيشن ورتو ، جنهن ۾  شاگردن لاءِ سنڌي زبان جي سکيا کي دلچسپ ۽ اثرائتو بڻائڻ لاءِ قابل رسائي ۽ عمر جي لحاظ سان مناسب مواد تيار ڪرڻ تي زور ڏنو ويو؛ ۽ ڊاڪٽر الطاف جوکيو، “لازمي سنڌي درسي ڪتابن جي تياري (گريڊ VI–VIII)” تي شرڪت ڪندڙن جي رهنمائي ڪئي، جنهن ۾ وچين درجي جي شاگردن جي تعليمي ۽ ثقافتي ضرورتن مطابق فڪري طور متحرڪ مواد تيار ڪرڻ جي حڪمت عملين تي زور ڏنو ويو. اڄ آخري ڏينهن، 28 آگسٽ 2025 تي، ورڪشاپ ۾ ٻه اهم سيشن شامل هوندا: “سنڌي متن لاء بيهڪ جون نشانيون”، جيڪو سنڌي گرامر ۽ بيهڪ جي نشانين تي هوندو ته جيئن زباني درستگي ۽ وضاحت کي يقيني بڻايو وڃي، ۽ آفتن جي خطرن کي گهٽائڻ، ثقافت ۽ ورثي، ۽ ڪيريئر تعليم جي فريم ورڪن جو انضمام، جيڪو درسي ڪتابن ۾ اهم سماجي موضوعن جهڙوڪ آفتن جي لاء مناسب تياري، سنڌ جي امير ثقافتي ورثي ۽ ڪيريئر جي رهنمائيءَ کي شامل ڪرڻ تي ڌيان ڏيندو ته جيئن شاگردن کي حقيقي دنيا جي چئلينجن لاءِ تيار ڪيو وڃي ۽ کين پنهنجي ورثي تي فخر جو احساس ڏياريو وڃي.

ورڪشاپ جو مقصد سنڌ جي نوجوانن کي علم، صلاحيتن ۽ قدرن سان بااختيار بڻائڻ لاءِ اعلي معيار، جامع ۽ مستقبل جي سوچ رکندڙ درسي ڪتاب تيار ڪرڻ آهي. (پريس رليز)

_____________