حبيب توميءَ وٽان
رياض، سعودي عرب
سعودي عرب ۽ پاڪستان ٻنھي ملڪن جي معاشي ضرورتن جي آڌار پاڻ ۾ اقتصادي سھڪار شروع ڪرڻ تي اتفاق ڪيو آھي.
جدہ ۾ نائين سالياني فيوچر انويسٽمينٽ انيشئيٽوِ FII9 ڪانفرنس جي موقعي تي سعودي وليعھد شھزادي ۽ وزيراعظم محمد بن سلمان السعود ۽ پاڪستان جي وزيراعظم شھباز شريف وچ ۾ ملاقات کانپوءِ جاري ٿيل ھڪ گڏيل بيان ۾ چيو ويو آھي تہ ٻنھي ملڪن ھڪٻئي جي گڏيل مفادن خاطر واپار ۽ سيڙپ وارن شعبن ۾ لاڳاپن کي وڌيڪ سگھارو ڪرڻ تي اتفاق ڪيو.
گڏيل بيان ۾ چيو ويو تہ سھڪاري فريم ورڪ ٻنھي ملڪن جي معاشي مفادن ۽ واپار ۽ سيڙپ جي شعبن ۾ لاڳاپن کي وڌيڪ سگھارو ڪرڻ جي گڏيل خواھش جي بنياد تي ھوندو.
انھيءَ فريم ورڪ تحت ڪيتريون ئي اھم رٿائون بحث ھيٺ اينديون جن ۾ معيشت، واپار، سيڙپ ۽ ترقياتي رٿائون شامل ھونديون. انھن رٿائن ۾ ٻنھي ملڪن جي خانگي شعبن جو اھم ڪردار ھوندو.
بيان موجب جن شعبن کي اوليت ڏني ويندي انھن ۾ توانائي، کاڻيون، انفارميشن ٽيڪنالاجي، سياحت، زراعت، فوڊ سيڪيورٽي وغيرہ شامل آھن. موجودہ وقت ٻئي ڌُريون گڏيل اقتصادي رٿائن جو جائزو وٺي رھيون آھن، جن ۾ پاڪستان ۽ سعودي عرب وچ ۾ بجليءَ جي حوالي سان مفاھمت وارو ٺاھ ۽ توانائيءَ جي شعبن ۾ سھڪار وارو ٺاھ بہ شامل آھن.
_____________
حبيب تومي The AsiaN جي انگريزي ايڊيشن جو ايڊيٽر آھي
