دنيا جي ھيءَ منفرد ڍنڍ آھي جيڪا مختلف وقتن تي پنهنجي پاڻيءَ جا رنگ بدلائيندي رھندي آهي
ھن ڍنڍ جي اونھائي اڃان ماپجي نه سگھي آهي ۽ نه ئي پاڻيءَ ۾ موجود ڪيميڪلز جي باري ۾ ڪا سائنسي ڇنڊڇاڻ ٿي آهي
ڪيميڪلز ڀريل ھن ڍنڍ جي ڪناري کان صرف 2 فُٽ پري جيڪڏهن 3 فُٽ اونھو کڏو کوٽي ڇڏبو ته اڌ ڪلاڪ اندر اھو صاف شفاف منرل واٽر جھڙي پاڻيءَ سان ڀرجي ويندو
آهي ڪو سنڌ جي ثقافت ۽ سياحت کاتي کي جاڳائڻ وارو ؟ ھيءُ وڏو سياحتي مرڪز ٿي سگھي ٿو پر بي ڌيانيءَ سبب ڍنڍ واريءَ سان لَٽجندي ٿي وڃي
مشڪورڦلڪارو
اڇڙي ٿر ۾ ڪيميڪلز سان ڀريل سنڌ جي ھڪ عجيب ڍنڍ موجود آھي ـ جنهن ڍنڍ جي اونھائي اڃان ماپجي نه سگھي آهي ۽ نه ئي پاڻيءَ ۾ موجود ڪيميڪلز جي باري ۾ ڪا سائنسي ڇنڊڇاڻ ٿي آهي ـ
ڪيميڪلز سبب ھن ڍنڍ ۾ ڪا به جيوت موجود ناهي ـ پر اڇڙي ٿر ۾ موجود دنيا جي ھي منفرد ڍنڍ مختلف وقتن تي پنهنجي پاڻيءَ جا رنگ بدلائيندي رھندي آهي ۽ چئو طرف ڀٽن جي وچ ۾ ھئڻ سبب سندس نظارا وڏا دلفريب ۽ حيرت ۾ وجھندڙ آهن ـ
ھن ڍنڍ جي پاڻيءَ ۾ خارش ۽ چمڙي جي بيمارين جا مريض به وھنجي شفاياب ٿيندا آهن ـ
حيرت ۾ وجھندڙ ھڪ ڳالھ ھيءَ به آهي ته زھريلي ڪيميڪلز واري ڀريل ھن ڍنڍ جي ڪناري کان صرف 2 فُٽ پري جيڪڏهن 3 فُٽ اونھو کڏو کوٽي ڇڏبو ته اڌ ڪلاڪ اندر اھو صاف شفاف منرل واٽر جھڙي پاڻيءَ سان ڀرجي ويندو جيڪو بھترين پيئڻ جي پاڻيءَ طور ڪم آڻي سگھجي ٿو ـ
ھيءَ ڍنڍ ٿورو بہ ڌيان ڏيڻ سان وڏو سياحتي مرڪز ٿي سگهي ٿي ـ
مون 2019ع ۾ پنهنجي تحقيقي ڪتاب ” سرسوتي تھذيب ۽ اڇڙو ٿر ” ۾ ھن ڍنڍ جي باري ۾ نه صرف نشاندھي ڪئي پر تفصيلي احوال به ڏنو پر سنڌ جي سياحت ۽ ثقافت کاتي جي ذميوارن جي اڃان تائين اک نه کلي آهي ۔ ھي ڍنڍ ھوائن جي ڪري، کليل واريءَ جي وچ ۾ ھئڻ سبب پورجي رھي آهي ـ شايد سندن نڀاڳي ننڊ سبب ڪجھ سالن اندر ھيءَ دنيا جي خوبصورت، منفرد ۽ ڪيميڪلز سان ڀريل ڍنڍ گم ٿي وڃي .
_____________
