ڪوريا جي فلم انڊسٽري – عالمي سنيما ۾ هڪ نئون انقلاب

ڪوريا جي فلم انڊسٽري، جنھن کي عام طور تي “ڪورين سئنيما“ جي نالي سان سڃاتو وڃي ٿو، گذريل ٻن ڏهاڪن دوران دنيا جي ڌيان جو مرڪز بڻجي چڪي آهي. خاص طور تي ڏکڻ ڪوريا جي فلمسازيءَ نه صرف قومي پر بين الاقوامي سطح تي پنھنجي خاص سڃاڻپ ٺاهي آهي.

ڪوريائي سنيما جي ارتقا

ڪوريائي فلمسازي جي شروعات 1910ع جي ڏهاڪي ۾ ٿي، جڏهن ڪوريا وارو ملڪ اڃان جاپاني قبضي هيٺ ھو. پهريائين خاموش فلم  ٺاهي وئي. پر حقيقت ۾ 1950ع جي ڏهاڪي بعد، ڪوريا جي فلم انڊسٽري پنهنجي پيرن تي بيھڻ لڳي. 1990ع کان پوءِKorean New Wave  جي نالي سان هڪ نئون رجحان شروع ٿيو، جنھن ۾ فني تجربن، اصلي موضوعن ۽ جديد ٽيڪنالاجيءَ جي مدد سان ڪورين فلمن نئين دنيا ۾ جڳھه ٺاهي.

عالمي سطح تي سڃاڻپ

ڪوريا جي فلم انڊسٽري جي وڏي ڪاميابي 2019ع ۾ بونگ جون هو جي فلم “Parasite” سان سامھون آئي، جيڪا نه صرف ڪينز فلم فيسٽيول ۾ بھترين فلم جو انعام کٽي وئي، پر آسڪر ايوارڊ ۾ به تاريخ رقم ڪئي، جتي اها بھترين فلم، بھترين هدايتڪاري، ۽ بھترين بين الاقوامي فيچر فلم جا انعام ماڻڻ واري پھرين غير انگريزي فلم بڻجي وئي.

موضوعن جي گهڻ رُخائي

ڪورين فلمن ۾ مختلف موضوعن تي ڪم ٿيندو آهي، جھڙوڪ: سماجي بي انصافي، طبقاتي فرق، خانداني لاڳاپا، نفسياتي مسئلا، تاريخي ۽ جنگي حالتون. اهي سڀ موضوع انتھائي سچائي ۽ فنڪاريءَ سان پيش ڪيا وڃن ٿا، جيڪي ڏسندڙن کي گھرو اثر ڏين ٿا.

ڪاميابيءَ جا سبب

مضبوط اسڪرپٽ ۽ ڪردار، اعليٰ معيار جي سينيماٽوگرافي، مقامي ثقافت جي عالمي انداز ۾ پيشڪش، سرڪاري مدد ۽ فنڊنگ ۽ نئين نسل جا ٽيلنٽيڊ ڊائريڪٽر ۽ اداڪار.

ڪورين ڊراما، فلمون، موسيقي (K-pop) ۽ ويب سيريز سڄي دنيا ۾ مقبول ٿي رهيا آهن، جنهن کي “Korean Wave”  يا “Hallyu” جي نالي سان سڃاتو وڃي ٿو Netflix، Amazon Prime ۽ ٻين اسٽريمنگ پليٽفارمز تي ڪورين مواد وڏي انگ ۾ ڏٺو وڃي ٿو.

ڪوريا جي فلم انڊسٽري، پنھنجي تخليقيت، سماجي شعور، ۽ فني پختگيءَ جي ڪري، عالمي سنيما جو هڪ اهم حصو بڻجي چڪي آهي. اها انڊسٽري نه رڳو ڏسندڙن کي تفريح مھيا ڪري ٿي، پر کين سوچڻ تي به مجبور ڪري ٿي. سنڌ ۽ پاڪستان جي فلم سازن لاءِ به ڪوريا جو ماڊل سکڻ جھڙو آهي، جتي قومي سڃاڻپ ۽ عالمي معيار کي گڏ رکندي ڪاميابي حاصل ڪئي وئي آهي.